Яко многоценное сокровище прият град Шуя чудесно написанную
икону Твою,Пресвятая Владычице,Дево Богородице,
во исцеление и во утешение православных Тобою дарованную,
от неяже источники благодатныя и до ныне обильно изливаются.
Пробави,пречистая,и на будущее время милости Твоя ведущим Тя,
храни град Твой и всю Русскую землю,и спасай людей
к Тебе с верою и любовию притекающих.

Хлебы приносныя руками своими творя,
псалмопение непрестанное усты своими
яко жертву хвалы приношаше Господеви,
со честным Никодимом,блаженне Спиридоне,
с нимиже молися Христу Богу о душах наших.

Твоего предстательства уверение и милосердия Твоего явление
икона Озерянская нам,Владычице,показася; пред неюже
души наша в молитве изливаем и верою Тебе вопием:
воззри,Милосердая,на люди Твоя,вся скорби наша
и печали утоли,утешение благое в сердца наша низпосли
и спасение вечное душам нашим,Пречистая,испроси.

Велия веры исправления,в пещернем затворе,
яко на воде упокоения,преподобне отче Авраамие,
радовался еси,огнем бо любве Божественным распаляемь,
бдением и молитвою безстрастия достигл еси и явился еси
равноангельный на земли,того молитвами,Христе Боже,
спаси души наша.

Милости наставниче и благоутробия сокровище,
еже всем отверзл еси,правоверию учителю и архиереев
Божественное удобрение,отче наш иерарше Арсение,
нищих был еси Заступник: тем моли Христа Бога
просветити души наша,да не когда уснем в смерть.

В пищи словес твоих,богоносе Арсение,
разумно чада твоя питая,языком хваля,
устнами же пение принося,вещанием зовый:
Христе,Ты еси Свет неизреченный.

Блаженство Евангельское возлюбив,Богомудре княже Андрее,
чистоту сердца девством почтил еси и,суету мира сего
презрев,устремился еси зрети Бога,Иже тя прослави
чудесы во врачевании различне страждущих.
Сего ради молим тя: проси нам у Христа Господа
всяких скорбей избавление и получение Царства Небеснаго.

Ублажаем вас,преподобнии отцы,
и чтем святую память вашу,
наставницы монахов и собеседницы Ангелов.

Преблаженнии и Богоноснии отцы наши,
яко стяжавшии дерзновение ко Господу
равноангельным своим житием,егоже ради
обогати Христос нетлением и чудесы мощи ваша,
молим вас прилежно: испросите душам нашим очищение
и велию и богатую милость.

Служивый в чину диаконства Господеви добре,
честный иеродиаконе Мартирие,и тамо яко слуга Господень
обретыйся,идеже и Господь твой,молися Ему и о нас,
да подаст нам велию милость.

Радуйся,Марие,великое всея твари чудо;
Радуйся Дщи убо Давидова,Господня же Мати;
радуйся,пение Гавриилово; радуйся прибежище и утверждение,
и помощь всем,Пресвятая,сущим на земли грешником.

Богатство твое душевное погубити хотя враг,
помрачил тя бяше богатством тленным исперва,
но всех спасаяй Господь богатство гибнущее окрасти
попусти,душевное же невредно соблюд,Небесных сокровищ
наследника тя показа,Арефо,тем тя чтим и ублажаем.

Преподобне отче наш Елиссее,
с Лаврентием чудным подвизался еси
учителю своему подражая,земную славу
и честь стопам Христа повергли есте,темже Господь
увенча вас нетленным венцем славы Своея.

Владычице,приими молитву раб Своих и избави нас
от всякия нужды и печали,Ты еси,Богородице,
оружие наше и стена,Ты еси заступница,
и к Тебе прибегаем,Тя и ныне на молитву призываем,
да избавиши нас от врагов наших.Возвеличим Тя вси,
Пренепорочную Матерь Христа Бога,Юже осени Дух Пресвятый.

Слава Отцу и Сыну и Святому Духу,
и ныне и присно,и во веки веков.Аминь.

О всемилостивая христианом Помощнице!
Не может Тя воспети достойно ум человеческий и ангельский,
яко всея твари честнейши,небесных и земных славнейши:
всех бо родила еси Творца и Бога.
Но,о Владычице,приими милостивно,юже Тебе от сердца
возложихом песнь,спасай нас всегда,на Тя бо надеемся.

Божественный гром,труба духовная,веры насадителю
и отсекателю ересей,Троицы угодниче,великий святителю
Иларионе,со Ангелы предстоя присно,моли непрестанно
о всех нас.

Величаем тя,святителю отче Иларионе,
и чтим святую память твою:
ты бо молиши о нас Христа Бога нашего.

Востину достойне наречен был еси Иларион,
тихостен бо и кроток нрав по имени твоему
имел еси,блаженне,имже кроткому
Господу Иисусу благоугодив,
молися Ему о нас рабех твоих.