Всякое разумение и всяк ум ангельский и человеческий
не постигает Твоего непостижнаго Рождества,Владыко,
таинства разумети; обаче,Владыко Благий,нашу любовь
и веру приими, и спаси нас,Тебе поющих:
Слава Тебе,Боже наш.

Новую показал еси тварь,явлься плотию всех Зиждитель,
из безсеменныя прозяб утробы,и сохранив ю,яко же бе
нетленну,и Ходатаицу спасения показал еси поющим:
Слава Тебе,Сыне Божий,Тя рождшую Матерь Милосердия показавый; слава Тебе,Тую и по рождестве Деву сохранивый.
Слава Тебе,спасти Адама пришедшему;
слава Тебе,Евины слезы утолившему.
Слава Тебе,вся спасти пришедый;
слава Тебе,воскресения образ облиставый.
Слава Тебе,грехов наших рукописание раздравый;
слава Тебе,Собою смирения образ нам показавый.
Слава Тебе,нас ради обнищавшему;
слава Тебе,Твоею нищетою нас обогатившему.
Слава Тебе,одеждою спасения нас одеявшему;
слава Тебе,Твоею любовия нас усладившему.
Иисусе,Сыне Божий,воплотивыйся нас ради,слава Тебе.

Всякое разумение и всяке ум ангельский и человеческий
не постигает Твоего непостижнаго рождества,Владыко,
таинства разумети; обаче,Владыко Благий,нашу любовь
и веру приими,и спаси нас,Тебе поющих:
Слава Тебе,Боже наш.

О,преподобне отче,великий заступниче,скорый услышателю,
угодниче Божий и чудотворче Ферапонте !
Не забуди нас,якоже обещался еси,посещай чада твоя;
аще бо и отшел еси от нас телом,но духом присно
с нами пребываеши. Молим убо тя,о преподобне отче:
избави ны от огня и меча,от нашествия иноплеменных
и междоусобныя брани,от тлетворных ветров и от внезапныя
смерти,и от всех прилог вражиих,находящих на ны.
Услыши ны грешныя,приими молитву и моление наше,
еже к тебе,яко кадило благовонное и яко жертву благоприятную
приносим. Умервщленныя злыми делы,словеси и помышленьми
души наша,преподобне отче,оживи и возстави. И якоже многих
приходящия к цельбоносному твоему гробу с верою,всякими
скорбьми и болезньми люте страждущия исцелил еси,тако и нас
исцели от недугов душевных и телесных. Исторгни нас
из глубины согрешений и на путь покаяния настави,
видимым твоим предстательством от видимых и невидимых
враг избавляя. Помози нам в житии сем и во исходе душ наших
и в будущей жизни,во веки веков. Аминь.

Молитва Анны /2Цар.2,1-10/:

Возрадовалось сердце моё о Господе,
возвеселилась душа моя о Боге моём;
отверзлись уста мои на врагов моих,
и радость о спасении Твоём переполняет меня.
Ибо нет святости более,чем в Господе,
и нет такого же другого,кроме Тебя;
и нет твердыни прочнее,чем Бог наш.
Не превозноситесь в речах надменных,
дерзкие слова да не исходят из уст ваших,
ибо один Господь наш есть Бог ведения,
и все дела у Него взвешены.
Рог сильных преломляется,а немощные
препоясываются силой; пресыщенные
работают для хлеба,а голодные отдыхают;
даже бесплодная мать рождает семь раз,
а многочадная изнемогает. Господь умервщляет
и оживляет,низводит в преисподнюю в возводит на небо.
Господь делает нищим и обогащает,уничижает и возвышает.
Из праха подъемлет Он бедного,из брения возносит нищего,
сажает с князем,и престол славы даёт им в наследие,
ибо у Господа основания земли,и Он утвердил на них вселенную.
Стопы святых Своих Он блюдёт,а беззаконные во тьме исчезают;
ибо не силой крепок человек. Господь сотрёт препирающихся
с Ним,с небес возгремит на них. Ибо свят Господь.
Да не хвалится мудрый мудростью своей,
и да не хвалится сильный силой своей,
и да не хвалится богатый богатством своим,
но желающий хвалиться да хвалится тем,что разумеет
и знает Господа. Господь будет судить концы земли,
Господь воздаст крепость царю Своему и вознесёт
рог помазанника - Христа Своего.

Смирился еси Христа ради,отче Ниле,
и,крест взем,отечества и сродник бегал еси;
отнюдуже в пустыню вшед и в ней трудолюбно
подвизался еси,преподобне.

Преподобне отче наш Ниле,моли Бога о нас.

Бодренными твоими молитвами,отче Ниле,
и жестоким воздержанием Богу на земли добре угодил еси,
и сего ради быв страшен врагом и славен человеком.

Слава Отцу и Сыну и Святому Духу:

Облистав зарею,просиял еси духовно
и явился еси Вышнему ликостоянию светел;
озари ми ум,блаженне,Трисиянным Светом Божества
и от страстей мя избави молитвами твоими.

И ныне и присно,и во веки веков,аминь:

Твою помощь даждь ми и избави мя от бед,
и скорбей,и прегрешений моих,
Яже всех рождши Избавление.

Странное чудо является притекающим к тебе,блаженне Николае,
священная твоя церковь: в ней бо и малое моление приносяще,
велиих недугов приемлем исцеление,аще токмо по Бозе
упование на тя возложим,верно вопиюще:
Слава Тебе,Боже наш!

О,предивный и всехвальный угодниче Божий,
преподобне отче Савво!
Днесь во святем храме твоем,
благоговейно предстояще пред святою
иконою твоею и радостно совершающе преславную
память твою,ублажаем тя заступника нашего.
Почитающе же твое дерзновение пред Господом,
смиренно молим тя преблаженне приими милостиво от нас
хвалебное пение сие,от любве и усердия тебе приносимое.
И,яко имеяй велие дерзновение ко Господу,потщися
Богоприятным твоим ходатайством испросити у Царя
царствующих и Господа господствующих,яко да пробавит
великия и богатыя милости своя на нас грешных,да подаст нам
дух правыя веры,дух ведения и любве,дух мира и радости
о Дусе Святе,да избавит от бед и напастей,да низпослет
вся полезная ко спасению душ наших.
Всем православным христианам да дарует долгоденствие
и душевное спасение,на супостаты одоление,во устроении
стране Российской благопоспешение и на вся благая начинания
благословение и премногую милость Свою и благоволение.
Святейшему же Патриарху Московскому и Всея Руси Алексию
да низпослет благодать Свою,право правити слово Христовы
истины: начальникам и судиям да подаст мудрость
и нелицеприятие. Всем же православным да низпослет
мир,тишину,безмятежие,усердие ко исполнению заповедей Его,
изобилие плодов земных: и да избавит всю Российскую страну
от глада,труса,потопа,огня,меча,нашествия иноплеменных
и междоусобныя брани,смертоносныя язвы и от всякаго зла.
Ей,угодниче Божий!Не презри молений наших,но услыши нас
молящихся тебе,и под кровом заступления твоего сохрани нас
ненаветны от врагов видимых и невидимых,да сподобимся скончати
житие наше в покаянии и восприимем вечная благая во царствии
Христа Бога нашего,идеже восхвалим с тобою и всеми святыми
достопокланяемое имя Пресвятыя Троицы,Отца и Сына
и Святаго Духа во веки веков. Аминь.

Первозванне апостоле Бога и Спаса нашего Иисуса Христа,
Церкве последователю верховный,всехвальне Андрее!
Славим и величаем апостольския труды твоя,сладце поминаем
твое благословенное к нам пришествие,ублажаем честная
страдания твоя,яже за Христа претерпел еси,лобызаем
священныя мощи твоя,чтим святую память твою и веруем,
яко жив Господь,жива же и душа твоя,и с Ним вовеки
на небеси пребываеши,идеже и нас любовию твоею не оставляеши,
якоже возлюбил еси отцы наша,егда Духом Святым прозрел еси
земли нашея ко Христу обращение. Веруем же,яко и молиши
о нас Бога,зря во свете Его вся нужды наша. Тако сию
веру нашу во храме твоем исповедуем,и Господа и Бога
и Спаса нашего Иисуса Христа молим,да молитвами твоими
подаст нам вся потребная ко спасению нас грешных:
да якоже ты абие ко гласу Господа,оставль мрежи твоя,
неуклонно Тому последовал еси,сице и кийждо от нас
не своих сих да ищет,но еже к созиданию ближняго,
и о горнем звании да помышляет. Имуще же тя предстателя
и молитвенника о нас,уповаем,яко молитва твоя много может
пред Господем и Спасителем нашим Иисусом Христом,Емуже
подобает всякая слава,честь и поклонение со Отцем
и Святым Духом во веки веков. Аминь.

Мрак наших заблуждений и житейския гордости
светлостию святых молитв твоих,Митрофане,прожени,
да помощию Твоею грехов оставление приимше,
милость у Христа Бога обрящем.

Слава Отцу и Сыну и Святому Духу,
и ныне и присно,и во веки веков,аминь.

Веселия днесь вся исполнися Российская земля,
в нарочитый день праздника преславнаго чудотворца,
Александра блаженнаго: соблюдает бо отечество свое
выну ненаветно.

Слава Отцу и Сыну и Святому Духу:

Сирот и вдов заступника и в бедах непоборимаго помощника,
песньми Александра ублажим,славяще: празднующих
бо память его весело от бед избавляет и скорбей.

И ныне и присно,и во веки веков,аминь:

Святый Иисус вселися во утробу Твою,во святых,Дево,
почиваяй и прославляяй верою истинною сего,
Отроковице,славящия.

Святый благоверный княже Александре,
моли Бога о нас.

Ты уподобился еси Моисею Боговидцу,
сокрушенным сердцем моляся о стаде твоем
избавити град твой и люди от вражия работы,
вопиющия: благословен Бог отец наших.

Святый благоверный княже Михаиле,
моли Бога о нас.

Приими похвалу о раб недостойних и молитву о нас
сотвори к Богу,честно творящих твою память,
да от бед и печалей и грех лютых
свободимся,тя величающе.

Святый благоверный княже Михаиле,
моли Бога о нас.

Предстоя у Престола всех Владыки,Боговидче Михаиле,
о творящих честное твое празднство,граду нашему
избавитися от напастей и бед,здравие и победу
всем православным христианом на противныя враги
испроси молитвами твоими.

Слава Отцу и Сыну и Святому Духу,
и ныне и присно,и во веки веков,аминь.

Избранный иноческаго жития ревнителю,
яко пчела многотрудная писаньми отеческими
души наша снабдил еси,коегождо наставляя на путь спасения.
Сего ради завем ти: радуйся,Паисие премудре,
старчества духовнаго в стране нашей возродителю.

Рождеству сотворяему безстуднаго Ирода,
скверныя плясавицы исполняшеся сложения клятвы.
Предтечева бо глава отсекшися,яко снедь ношашеся
на блюде возлежащим. О пира мерзка,непреподобна деяния
и убийства исполнена! Но мы Крестителя,яко в рожденных
женами больша,достойно чтуще ублажаем.

Пляса ученица вселукаваго диавола,
и главу твою,Предтече,мзду взят.
О пира исполнена кровей!
Лучше бы не клятися,Ироде беззаконне,
лжи внуче; аще ли же и клялся еси,
но не о добре клялся: лучше бе
солгавшу жизнь получити,неже
истинствовавшу главу Предтечеву усекнути.
Но мы Крестителя,яко в рожденных
женами больша,достойно чтуще ублажаем.

Не подобаше ти,о Ироде,прелюбодеянию обличителя,
ради рачения сатанинска,и разжжения неистовнаго блуда,
смертию осудити: не подобаше ти того всечестную главу
пребеззаконней жене,ради клятвы плясания,предати бедне.
О како дерзнул еси таково убийство совершити,
како не опалися скверная плясавица,
посреди пира на блюде носящи сию;
но мы Крестителя,яко в рожденных
женами больша,достойно чтуще ублажаем.

Паки Иродия бесится,паки смущается.
О плясания льстивна,и пира с лестию!
Креститель усекашеся,и Ирод смущашеся.
Молитвами,Господи,Твоего Предтечи,
мир подаждь душам нашим.

Слава Отцу и Сыну и Святому Духу:

Рождеству сотворяему безстуднаго Ирода,
скверныя плясавицы исполняшеся сложения клятвы.
Предтечева бо глава отсекшися,яко снедь ношашеся
на блюде возлежащим. О пира мерзка,непреподобна деяния
и убийства исполнена! Но мы Крестителя,яко в рожденных
женами больша,достойно чтуще ублажаем.

И ныне и присно,и во веки веков,аминь:

Кто Тебе не ублажит,Пресвятая Дево;
кто ли не воспоет Твоего пречистаго рождества;
безлетно бо от Отца возсиявый Сын Единородный;
Тойже от Тебе,Чистыя,пройде,неизреченно воплощься
естеством Бог сый,и естеством быв человек нас ради,
не во двою лицу разделяемый,но во двою естеству
неслитно познаваемый. Того моли,Чистая,Всеблаженная,
помиловатися душам нашим.

О дивное чудо! Источник Жизни во гробе полагается,
и лествица к небеси гроб бывает: веселися,Гефсимание,
Богородичен святый доме. Возопием,вернии,Гавриила имуще
чиноначальника: Благодатная,радуйся,с Тобою Господь,
подаяй мирови Тобою велию милость.

Дивны Твоя тайны,Богородице,Вышняго престол явилася еси,
Владычице,и от земли к небеси преставилася еси днесь.
Слава Твоя боголепная,богоподобными сияющи чудесы.
Девы,с Материю Царевою на высоту вознеситеся.
Благодатная,радуйся,с Тобою Господь,
подаяй мирови велию милость.

Твое славят успение,Власти и Престоли,Начала и Господьства,
Силы и Херувимы,и страшнии Серафими: радуются земнороднии
о божественней Твоей славе красящеся. Припадают вернии
со Архангелы и Ангелы,и воспевают: Благодатная,радуйся,
с Тобою Господь,подаяй мирови Тобою велию милость.

Слава Отцу и Сыну и Святому Духу,
и ныне и присно,и во веки веков,аминь.

Богоначальным мановением,отовсюду богоноснии апостоли
облаки высоце взимаеми,дошедше пречистаго и живоначальнаго
Твоего тела,любезно лобызаху. Превышния же небесныя силы,
с своим Владыкою пришедше,богоприятное и пречистое тело
предсылающе ужасом одержими,прекрасно же предыдяху,
и невидимо вопияху превышним чиноначалием:
се Всецарице Богоотроковице прииде,возмите врата
и сию премирно подымите,Присносущнаго Матерь Света,
Тоя бо ради всеродное человеком спасение бысть; на Ню же
взирати не можем,и Той достойную честь воздать немощно;
Тоя бо преизящное преходит всяк ум. Темже,Пречистая
Богородице,присно с Живоносным Царем,и Рождеством живущи,
молися выну сохранити и спасти,от всякаго прилога противнаго,
новыя люди Твоя: Твое бо предстательство стяжахом,
во веки светоявленно блажаще.

Прежде Креста Твоего,Господи,гора небеси подобящися,
и облак яко сень протязашеся,Тебе преобразующуся,
от Отца же свидетельствуему,тамо бе Петр со Иаковом,
и Иоанном,яко хотяху быти с Тобою,и во время предания Твоего:
да видевше чудеса Твоя,не устрашатся страданий Твоих,
имже поклонитися нам в мире сподоби,великия ради Твоея милости.

Прежде Креста Твоего,Господи,поим ученики на гору высоку,
преобразился еси пред ними,лучею силы озаряя их,
отсюду убо человеколюбием,отонуду властию,
показати хотя воскресения светлость:
егоже и нас,Боже,в мире сподоби,
яко Милостив и Человеколюбец.

Гора,яже иногда мрачна и дымна,ныне же честна и свята есть,
на нейже нозе Твои стоясте,Господи,превечное бо сокровенное таинство,напоследок явлено сотвори:
страшное Твое преображение,Петру,и Иоанну,и Иакову,
иже такова сияния лица Твоего не терпяще,и светлости
риз Твоих,ниц на лице земли покрывахуся,иже и ужасом
одержими,дивляхуся,видяще Моисея и Илию,глаголюща с Тобою,
хотящая приключитися Тебе,и глас от Отца свидетельствоваше,
глаголя: Сей есть Сын Мой возлюбленный,о Немже благоизволих,
Того послушайте,Иже и дарует мирови велию милость.

На горе высоце преображься Спас,верховныя имея ученики,
преславно облистал есть,показуя,яко высотою добродетелей
облиставше,и Божественней славе сподобятся,глаголющия
со Христом Моисей и Илия показоваху,яко живыми и мертвыми
обладает,Емуже и глас Отечь из облака светла послушествоваше
глаголющий: Того послушайте,Иже Крестом ада пленивша,
и мертвым дарующа живот вечный.

Слава Отцу и Сыну и Святому Духу,
и ныне и присно,и во веки веков,аминь.