Преблагословенная Матерь Божия,моли Христа Бога о нас.

Богородительнице Дево,моли Христа Бога о нас.

В постничестве от юности добре подвизався,Богомудре,
ум на враги мужески вооружив,оружием крестным
сих победил еси,твердомудростная повлача,
в душу вложи свою; темже похваляем тя,княже наш Глебе,
яко постником ты еси удобрение,Киеву - слава
и всей Русстей земли - утверждение.

Предстательство страшное и непостыдное,
не презри,Благая,молитв наших,Всепетая Богородице,
Милостивая верных Домостроительнице,утверди православных
жительство,спаси страну нашу и всех православно живущих в ней
защити,зане родила еси Бога,Едина Благословенная.

Смирением достоинство княжеское сокрывши,
богомудрая Елисавето,сугубым служением Марфы и Марии
Христа почтила еси; милосердием,терпением и любовию
себе предочистивши,яко жертва праведная Богу принеслася еси.
Мы же,чтуще добродетельное житие и страдания твоя,
яко истинную наставницу усердно просим тя:
святая мученице великая княгине Елисавето,
моли Христа Бога спасти и просветити души наша.

Величие подвига веры кто повесть: во глубине земли,
яко в раи светлости,страстотерпица великая княгиня Елисавета
со Ангелы во псалмех и пениих радовашеся
и,убиение претерпевающи,о безбожных мучителех взываше:
Господи,прости им грех сей,не ведят бо,что творят.
Тоя молитвами,Христе Боже,помилуй и спаси души наша.

Пресвятая Матерь Божия,моли Христа Бога о нас.

Мирликийскому предстателю,благоверный царю,подражатель
показался еси,Христово бо Евангелие исполнив,положил еси
душу твою за люди твоя и спасл еси повинныя,паче же
неповинныя,от смерти,сих ради мученическою кровию
освятился еси,яко великомученик Церкве Христовы.

От юности к Божественной красоте устремляяся,
чудный иконописец в земли Российстей был еси,
и,богоносным твоим учителем поревновав,
сиянием добродетелей украсился еси,преподобне Андрее,
темже и явися Церкве нашея похвала и радование.

Иже Христа ради волею оставив твое отечество,град Вологду,
и вся красная мира сего возненавидев,желанием духовным
вселился еси во град Ростов,яко в пустыни скитаяся в нем,
гладом и жаждею и безмерною тяготою плоть твою изнуряя
и работая Господеви день и нощь,в посте и молитве пребывая
в притворе церковнем,власы же главы твоея пеплом
и смолою удручая,и,ревнуя Василию блаженному,
пришел еси в царствующий град Москву
и,в целомудрии и терпении течение добре скончав,
переселился еси к вечным обителем,чудес лучи испущая,
преблаженне Иоанне,отче наш,моли Христа Бога
спастися душам нашим.

Преблаженнии и Богоноснии отцы наши,
Анатолие и Анатолие Затворниче,
яко стяжавшии дерзновение ко Господу равноангельным своим житием,егоже ради обогати Христос нетлением
и чудесы мощи ваша,молим вас прилежно:
испросите душам нашим очищение
и велию и богатую милость.

Богородице Приснодево,человеков покрове,
ризу и пояс пречистаго Твоего телесе,державное
граду Твоему обложение даровала еси,
безсеменным рождеством Твоим нетленна пребывающи,
о Тебе бо и естество обновляется и время.
Темже и молим Тя мир граду Твоему даровати
и душам нашим велию милость.

Одеяние всем верным нетления,Богоблагодатная Чистая,
даровала еси священную ризу Твою,еюже священное
тело Твое покрывала еси,покрове всех человеков,
еяже положение празднуем любовию
и вопием со страхом Ти,Чистая:
радуйся,Дево,христиан похвало.

Пресвятая Матерь Божия,моли Христа Бога о нас.

Благодать приимше исцелений,простираете здравие
сущим в нуждах,врачеве,чудотворцы преславнии;
но вашим посещением ратников дерзости низложите,
мир исцеляюще чудесы.

Заступнице земли Российския от нашествия Свейскаго
и непрестанная за нас Молитвеннице,мир земли
и душам нашим у Господа испроси,
да святится в нас Имя Божие во веки.

Еже от века таинство открывается днесь,
и Сын Божий,сын человечь бывает,
да хуждшее восприем,подаст ми лучшее.
Солгася древле Адам и Бог возжелев быти,
не бысть: человек бывает Бог,да Бога
Адама соделает.Да веселится тварь,
да ликовствует естество,яко Архангел
Деве со страхом предстоит,и еже радуйся
приносит,печали сопротивное.
За милосердие милости вочеловечивыйся,
Боже наш,слава Тебе.